រដ្ឋបាលខេត្តសៀមរាប និងអគ្គលេខាធិការដ្ឋាន នៃគណៈកម្មាធិការជាតិ ជំរុញចលនាភូមិផលិតផលមួយ បើកកិច្ចប្រជុំពិភាក្សារៀបចំវទិកាផ្គូផ្គងផលិតផលភូមិមួយ ផលិតផលមួយ នាចុងខែសីហានេះ

(សៀមរាប)៖ រដ្ឋបាលខេត្តសៀមរាប និងអគ្គលេខាធិការដ្ឋាន នៃគណៈកម្មាធិការជាតិជំរុញចលនាភូមិមួយ ផលិតផលមួយ បានបើកកិច្ចប្រជុំគណៈកម្មាធិការជំរុញចលនាភូមិមួយ ផលិតផលមួយ ខេត្តសៀមរាប ដើម្បីពិភាក្សាក្នុងការរៀបចំវទិកាផ្គូផ្គងផលិតផលភូមិមួយ ផលិតផលមួយ ដែលត្រូវរៀបចំធ្វើឡើងនៅថ្ងៃទី២៥-២៧ ខែសីហាខាងមុខនេះ នៅផ្សារម៉ាក្រូ ខេត្តសៀមរាប។

កិច្ចប្រជុំនេះ ក្រោមអធិបតីភាពលោក ផល សុជាតិ អគ្គលេខាធិការ នៃអគ្គលេខាធិការដ្ឋានជំរុញចលនាភូមិមួយ ផលិតផលមួយ និងលោក យុន លីណេ អភិបាលរងខេត្តសៀមរាប និងជាអនុប្រធានគណៈកម្មាធិការជាតិជំរុញចលនាភូមិ១ ផលិតផល១ខេត្តសៀមរាប និងមានការចូលរួមពីប្រធានសភាពាណិជ្ជមណ្ឌលសៀមរាប-ឧត្តរមាជ័យ, អភិបាលរងបណ្តាខេត្តមួយចំនួន នាយករងរដ្ឋបាលសាលាខេត្ត, ថ្នាក់ដឹកនាំមន្ទីរ អង្គភាព និងមន្ត្រីពាក់ព័ន្ធក្នុងខេត្ត ព្រមទាំងសមាជិក សមាជិកាភូមិ១ ផលិតផល១ ជាច្រើនចូលរួមផងដែរ។

កិច្ចប្រជុំនេះ ធ្វើឡើងក្នុងគោលបំណងដើម្បីត្រៀមលក្ខណៈសម្បត្តិសម្រាប់ចូលរួមក្នុងវេទិកាផ្គូផ្គងរវាងអ្នកលក់និងអ្នកទិញ របស់គម្រោងអភិវឌ្ឍអាជីវកម្មប្រកបដោយសុចរិតភាព និងការទទួលបានទីផ្សារសម្រាប់អ្នកផលិតក្នុងស្រុក និង M/SMEs និងនាំចេញនៅនឹងកន្លែង ដែលគ្រោងរៀបចំឡើងពីថ្ងៃទី២៥ ដល់ថ្ងៃទី២៧ ខែសីហាខាងមុខនេះ នៅផ្សារម៉ាក្រូក្រុងសៀមរាបខេត្តសៀមរាប ដើម្បីដាក់តាំងបង្ហាញផលិតផលនានាស្វែងរកដៃគូអាជីវកម្ម។ សំដៅបង្កលក្ខណៈងាយស្រួលដល់ផលិតករដែលផលិតបានអាចបញ្ជូនផលិតផលរបស់ខ្លួនលក់ដល់គោលដៅដោយប្រសិទ្ឋិភាពនិងបានច្រើនជាងមុន។ លើសពីនេះទៅទៀត ពួកគេនឹងមានឱកាសភ្ជាប់ទំនាក់ទំនងជាមួយតួអង្គផ្សេងៗ ដូចជាអាជ្ញាធរមូលដ្ឋាន អង្គការមិនម៉ែនរដ្ឋាភិបាល និងក្រុមយុជនដែលអាចផ្តល់ការគាំទ្រអាជីវកម្មរបស់ពួកគាត់។

លោក យុន លីនណេ អនុប្រធានគណៈកម្មាធិការខេត្តជំរុញចលនាភូមិមួយ ផលិតផលមួយ ខេត្តសៀមរាប បានលើកឡើងថា ខេត្តមានចំនួន៤២ផលិតផល សម្រាប់ចូលរួមផ្គូផ្គងនាពេលខាងមុខ និងនៅមានផលិតផលមួយចំនួនទៀត ដែលត្រៀមចូលជាសមាជិកនៃគណៈកម្មាធិការជាតិជំរុញចលនាភូមិមួយ ផលិតផលមួយផងដែរ។

លោក យុន លីនណេ ក៏បានណែនាំដល់ផលិតករ អាជីវករ ម្ចាស់សហករណ៍សិប្បកម្ម សហគ្រាសធុនតូច ធុនមធ្យម ដែលជាសមាជិកសមាជិកានៃគណៈកម្មាធិការជាតិជំរុញចលនាភូមិមួយ ផលិតផលមួយ សូមបន្តពង្រឹងគុណភាព អនាម័យ និងបច្ចេកទេសវិចខ្ចប់ឱ្យត្រូវតាមស្តង់ដារនៃផលិតផលរបស់ខ្លួន ដើម្បីចូលរួមក្នុងវេទិកាផ្គូផ្គងប្រកួតប្រជែងសម្រាប់ឈានចូលទីផ្សារជាតិ និងអន្តរជាតិ ពិសេសដើម្បីឱ្យផលិតផលរបស់ខ្លួនរក្សាបានលំនឹងទីផ្សារ ចៀសវាងបាននូវការប្រើពាក្យថា (សូមជួយទិញខ្ញុំផង)។

លោក ផល សុជាតិ អគ្គលេខាធិការនៃគណៈកម្មាធិការជាតិជំរុញចលនាភូមិមួយ ផលិតផលមួយ បានលើកឡើងដែរថា គណៈកម្មាធិការជាតិជំរុញចលនាភូមិមួយ ផលិតផលមួយ បានបង្កើតអស់រយៈពេល១៦ឆ្នាំហើយ ដោយសម្តេចតេជោ ហ៊ុន សែន នាយករដ្ឋមន្ត្រី បានយកចិត្តទុកដាក់ខ្លាំងណាស់លើចលនាភូមិមួយ ផលិតផលមួយ ព្រោះវាអាចជួយធ្វើឱ្យសេដ្ឋកិច្ចមូលដា្ឋនល្អ។ ក្រោយឆ្នាំ២០១៣ និងជាបន្តបន្ទាប់បានរៀបចំកសាងឯកសារគតិយុត្តិសំខាន់ៗ និងគោលនយោបាយមួយចំនួនទៀត ក្នុងនោះបានរៀបចំឡើងវិញនូវគោលនយោបាយជាតិស្តីពីការជំរុញចលនាភូមិមួយផលិតផលមួយឆ្នាំ២០១៦-២០២៦ និងបានកសាងផែនការយុទ្ឋសាស្ត្រជាតិជំរុញចលនាភូមិមួយផលិតផលមួយលើកទី១ឆ្នាំ២០១៩-២០២៣។

នៅចុងឆ្នាំ២០២១ គណៈកម្មាធិការជាតិជំរុញចលនាភូមិមួយ ផលិតផលមួយ បានចប់ដំណាក់កាលទី១ នៃចលនាភូមិមួយ ផលិតផលមួយ និងនៅឆ្នាំ២០២១ ដែលមានខេត្តចំនួន១០ ចងក្រងបាន១២០ផលិតផល នៅឆ្នាំ២០២២ ទាំង២៥ រាជធានី/ខេត្ត ចងក្រងបាន៦០០ផលិតផល ដោយឡែកខេត្តសៀមរាប មាន៤២ផលិតផល។

លោកបានបញ្ជាក់ថា ភូមិមួយ ផលិតផលមួយទាមទារឱ្យមានការចូលរួមយ៉ាងសកម្មពីក្រសួង អង្គភាព មន្ទីរស្ថាប័នពាក់ព័ន្ឋ ធ្វើយ៉ាងណាជំរុញឱ្យមានការអភិវឌ្ឍផលិតផលថ្មីៗ ក៏ដូចជា ពង្រឹងគុណភាព និងសមត្ថភាពពាណិជ្ជកម្មនៃផលិតផល ដែលមានស្រាប់ នេះជាគោលការណ៍គ្រឺះ ជាគោលដៅដែលយើងចង់បាន សំដៅធ្វើឱ្យទទួលបាននូវផលិតផលមានភាពសម្បូរបែបផងដែរ៕

(សូមអានបន្ត)

រដ្ឋមន្រ្តីក្រសួងព័ត៌មាន ឲ្យត្រៀមរៀបចំការប្រកួតប្រជែងរ៉ូបូតអន្តរជាតិឆ្នាំ២០២៣ គ្រោងរៀបចំធ្វើឡើងនៅចុងខែសីហា ឆ្នាំ២០២៣ ដែលមានប្រទេសជាច្រើននឹងនាំយករ៉ូបូតមកចូលរួមប្រកួត

 

(ភ្នំពេញ)៖ រដ្ឋមន្រ្តីក្រសួងព័ត៌មាន បានឲ្យត្រៀមរៀបចំការប្រកួតប្រជែងរ៉ូបូតអន្តរជាតិឆ្នាំ២០២៣ គ្រោងរៀបចំធ្វើឡើងនៅចុងខែសីហា ឆ្នាំ២០២៣ នៅរាជធានីភ្នំពេញ ដែលបណ្តាប្រទេសជាច្រើន នាំយករ៉ូបូតមកចូលរួមប្រកួត ប្រជែងដើម្បីបង្ហាញសមត្ថភាព ស្ថាដៃ និងទេពកោសល្យរបស់ខ្លួនរៀងៗខ្លួន។

ការបញ្ជាក់នេះរបស់រដ្ឋមន្រ្តីក្រសួងព័ត៌មាន លោក ខៀវ កាញារីទ្ធ ក្នុងឱកាសនៃកិច្ចប្រជុំសាមញ្ញប្រចាំសប្តាហ៍ របស់ថ្នាក់ដឹកនាំក្រសួងព័ត៌មាន ដោយមានការចូលរួមផ្ទាល់ និងតាមរយៈប្រព័ន្ធ វីដេអូ Zoom ដែលបានធ្វើឡើងនៅព្រឹកថ្ងៃទី២៧ ខែកុម្ភៈ ឆ្នាំ២០២៣ នាសាលប្រជុំព្រះវិហារ ក្រសួងព័ត៌មាន។

តាមរយៈអង្គសន្និបាតបូកសរុបការងាររយៈពេល៥ឆ្នាំនេះដែរ លោករដ្ឋមន្រ្តី បានជម្រុញដល់បណ្តាអគ្គនាយកដ្ឋានទាំង៥ ចំណុះអោយក្រសួងព័ត៌មាន ធ្វើជារបាយការណ៍សង្ខេបខ្លីពីការងារអ្វីដែលធ្វើបាន និងធ្វើមិនបាន មូលហេតុអ្វី ហើយលើកគម្រោងទិសដៅ ដើម្បីបន្តអនុវត្តន៍ទៅមុខទៀត។ ជាមួយនេះ បណ្តាមន្ទីរព័ត៌មានរាជធានី-ខេត្ត ក៏ត្រូវធ្វើរបាយការណ៍ខ្លីដូចគ្នានេះដែរ។

កិច្ចប្រជុំប្រចាំសាមញ្ញប្រចាំសប្តាហ៍នាឱកាសនេះ បានធ្វើការពិនិត្យលើកិច្ចការងារដែលគ្រប់ផ្នែកគ្រប់ជំនាញ បានអនុវត្តនាពេលកន្លងមក និងដាក់ចេញជាផែនការ កិច្ចការងារ ព័ត៌មាន និងសោតទស្សន៍ សម្រាប់បំពេញព្រឹត្តការណ៍អន្តរជាតិសំខាន់ៗ ដែលកម្ពុជាធ្វើជាម្ចាស់រៀបចំ។

ថ្នាក់ដឹកនាំតាមបណ្តា អគ្គនាយកដ្ឋានទាំង ៥ចំណុះឲ្យក្រសួងព័ត៌មាន រួមជាមួយរដ្ឋលេខាធិការ អនុរដ្ឋលេខាធិការ ជាប្រធានគណ:កម្មការ និងអនុគណ:កម្មការ បានធ្វើរបាយការណ៏លើកឡើងពីវឌ្ឍនភាពការងារសំខាន់ៗ នានាដែលមន្រ្តី និងថ្នាក់ដឹកនាំគ្រប់ផ្នែកគ្រប់ជំនាញសម្រេចអនុវត្តន៍នាពេលកន្លងនេះ ដោយបានធ្វើអោយរាល់កិច្ចការងារបានដំណើរដោយរលូន។

ទន្ទឹមគ្នានេះដែរ ថ្នាក់ដឹកនាំ តាមបណ្តាផ្នែកជំនាញនីមួយៗក៏បានលើកពីផែនការសកម្មភាពការងារដែល ត្រូវបន្តធ្វើសម្រាប់សប្តាហ៍បន្តបន្ទាប់ទៀតឲ្យបានកាន់តែល្អប្រសើរ។ រដ្ឋមន្រ្តី ខៀវ កាញារីទ្ធ បានថ្លែងនូវការកោតសរសើរ ចំពោះថ្នាក់ដឹកនាំ មន្រ្តីរាជការ គ្រប់លំដាប់ថ្នាក់ គ្រប់ផ្នែក គ្រប់ជំនាញ ដែលបានខិតខំប្រឹងប្រែងអស់ពីសមត្ថភាព កំលាំងកាយចិត្ត ដើម្បីសម្រេចបានលទ្ធផលការងារបានយ៉ាងល្អ។

លោករដ្ឋមន្រ្តី បានឲ្យផ្នែករដ្ឋបាល រៀបចំសៀវភៅ ៣ភាសា ដែលក្រសួងព័ត៌មាន បានបោះពុម្ភរួចហើយ មានចំណងជើងថា «កម្ពុជាក្នុងក្រសែភ្នែកពិភពលោក» ជាភាសាខ្មែរ បារាំង និងភាសាអង់គ្លេស ចំនួន៣ៗច្បាប់ ទុកដើម្បីយកទៅជូនដល់គ្រប់រដ្ឋមន្រ្តី រដ្ឋលេខាធិការដ្ឋាន និងអាជ្ញាធរ។ ជាជំហានបន្ទាប់ទៀត នឹងយកជូនគ្រប់សមាជិករដ្ឋសភា ព្រឹទ្ធសភា ក្រុមប្រឹក្សាធម្មនុញ្ញ សមាជិករាជរដ្ឋាភិបាល អភិបាលខេត្ត អភិបាលស្រុក និងគ្រប់មហាវិទ្យាល័យ និងសកលវិទ្យាល័យនៅកម្ពុជា ចំនួន៣ៗច្បាប់ដូចគ្នា។

«កម្ពុជាក្នុងក្រសែភ្នែកពិភពលោក» មិនមែនមានត្រឹមតែ៣ ភាសានេះទេ ជាជំហានបន្ទាប់ទៀត មានការបកប្រែ និងបោះពុម្ពជាភាសា ចិន ជប៉ុន និងភាសាអារ៉ាប់

(សូមអានបន្ត)

ឧត្តមសេនីយ៍ឯក លឹម សុខារស្មី អំពាវនាវភ្នាក់ងារសន្ដិសុខឯកជន បន្ដចូលរួមលើកកម្ពស់គោលនយោបាយ «ភូមិ-ឃុំសង្កាត់ មានសុវត្ថិភាព»

ភ្នំពេញ៖ លោកឧត្តមសេនីយ៍ឯក លឹម សុខារស្មី ប្រធាននាយកដ្ឋានគ្រប់គ្រងសន្ដិសុខឯកជន នៃអគ្គស្នងការដ្ឋាននគរបាលជាតិ បានអំពាវនាវដល់ភ្នាក់សន្ដិសុខឯកជនទាំងអស់ បន្ដចូលរួមលើកកម្ពស់គោលនយោបាយ «ភូមិ-ឃុំសង្កាត់ មានសុវត្ថិភាព» របស់រាជរដ្ឋាភិបាលកម្ពុជាឲ្យកាន់តែទទួលបានលទ្ធផលល្អប្រសើរបន្ថែមទៀត សំដៅកាត់បន្ថយបទល្មើសនានាក្នុងសង្គម។

ការអំពាវនាវរបស់លោកឧត្តមសេនីយ៍ឯក លឹម សុខារស្មី ធ្វើឡើងនៅល្ងាចថ្ងៃទី១៧ ខែកុម្ភៈ ឆ្នាំ២០២៣នេះ ក្នុងឱកាសអញ្ជើញជាអធិបតីតំណាង នាយឧត្តមសេនីយ៍ សន្ដិបណ្ឌិត នេត សាវឿន អគ្គស្នងការនគរបាលជាតិ ក្នុងពិធីបិទវគ្គបំប៉នជំនាញភ្នាក់ងារសន្ដិសុខឯកជន លើកទី៤៦។

លោកឧត្តមសេនីយ៍ឯក ប្រធាននាយកដ្ឋាន បានអះអាងថា កិច្ចការពារសុខសន្តិភាព និងសន្តិសុខសុវត្ថភាពសង្គម គឺជាកាតព្វកិច្ចរបស់យើងទាំងអស់គ្នាដែលត្រូវរួមគ្នាបង្ការ ទប់ស្កាត់ និងបង្រ្កាប រាល់បទល្មើសនានា តាមគ្រប់គ្រប់រូបភាព ដើម្បីភាពសុខសាន្តរបស់ប្រជាពលរដ្ឋ ក៏ដូចជាភ្ញៀវជាតិ និងអន្តរជាតិដែលកំពុងស្ថិតនៅប្រទេសយើងផងដែរ។

លោកឧត្តមសេនីយ៍ឯក លឹម សុខារស្មី បានថ្លែងយ៉ាងដូច្នេះថា «យើងរួមគ្នាអនុវត្តនូវគោលនយោបាយរបស់រាជរដ្ឋាភិបាលដែលដាក់ចេញនូវ ភូមិ-ឃុំ-សង្កាត់ មានសុវត្ថិភាព ផ្តោតសំខាន់ទៅលើកិច្ចការពារ សន្តិសុខ សុវត្ថិភាពនៅតាមបណ្តាភូមិ-ឃុំ-សង្កាត់ មិនឲ្យមានបទល្មើសកើតឡើង។ វិស័យសន្តិសុខឯកជន ក៏ជាវិស័យដ៏សំខាន់មួយ ដែលបានចូលរួមចំណែកយ៉ាងសកម្ម ក្នុងការអនុវត្តគោលនយោបាយ ភូមិ-ឃុំ-សង្កាត់ មានសុវត្ថិភាព និងថែរក្សាសន្តិសុខសណ្តាប់ធ្នាប់សង្គម ក៏ដូចជាការពារផលប្រយោជន៍ជាតិ និងការអភិវឌ្ឍន៍ប្រទេសជាតិយើងផងដែរ»។

លោកឧត្តមសេនីយ៍ឯក លឹម សុខារស្មី បានអំពាវនាវដល់បណ្តាក្រុមហ៊ុនផ្តល់សេវាសន្តិសុខឯកជនទាំងអស់ ចាត់បញ្ជូនភ្នាក់ងារសន្តិសុខឯកជន ដែលមានជំនាញចូលរួមការពារសន្តិសុខ សុវត្ថិភាព សណ្តាប់ធ្នាប់ ជាមួយកងកម្លាំងមានសមត្ថកិច្ច ក្នុងព្រឹត្តិការណ៍ប្រកួតកីឡា SEA Games លើកទី៣២ និង Para Games លើកទី១២ ឆ្នាំ២០២៣ ដែលកម្ពុជាធ្វើជាម្ចាស់ផ្ទះឲ្យទទួលបានជោគជ័យ។

ក្នុងឱកាសនោះ លោកឧត្តមសេនីយ៍ឯក លឹម សុខារស្មី សូមកោតសរសើរចំពោះភ្នាក់ងារសន្តិសុខជន ក្នុងការចូលរួមបង្ការទប់ស្កាត់នូវបទល្មើសនានា ធ្វើឲ្យបទល្មើសមានការកាត់បន្ថយមួយចំនួនផងដែរ ហើយលោកសូមលើកទឹកចិត្ត និងគាំទ្រ ដល់ភ្នាក់ងារសន្តិសុខឯកជន រាយការណ៍អំពីសកម្មភាពបទល្មើស ដូចជា បទល្មើសគ្រឿងញៀន បង្ខាំងមនុស្សខុសច្បាប់ ការជួញដូរមនុស្ស ការជួញដូរពលកម្ម ការប្រើប្រាស់អំពីហឹង្សា និងការរំលោភបំពានលើកុមារនិងស្ត្រី ។ល។ ពិសេសនៅតាមបណ្តាគោលដៅ បុរី ខុនដូរ អាផាតមិន សណ្ឋាគារ ផ្ទះសំណាក់ និងគោលដៅងាយរងគ្រោះសំខាន់ៗ។

ជាមួយគ្នានេះ លោកក៏បានជំរុញដល់ភ្នាក់ងារសន្តិសុខឯកជន ពិសេសនូវគោលដៅខាងលើនេះ ត្រូវមានការហ្វឹកហាត់ជំនាញ បង្ការ និងពន្លត់អគី្គភ័យ ព្រមទាំងជំនាញតាមដានត្រួតពិនិត្យ និងសង្កេតជនសង្ស័យ ដែលមានបំណងចង់ប្រព្រឹត្តបទល្មើសនៅគោលដៅរបស់យើង និងជាពិសេសត្រូវយកចិត្តទុកដាក់ សហការជាមួយអាជ្ញាធរមានសមត្ថកិច្ចជាប់ជាប្រចាំ។

សូមបញ្ជាក់ថា រហូតមកដល់ពេលនេះ ការបើកវគ្គបំប៉នជំនាញភ្នាក់ងារសន្ដិសុខឯកជន របស់នាយកដ្ឋានគ្រប់គ្រងសន្ដិសុខឯកជន បានចំនួន៤៦វគ្គ ភ្នាក់ងារសន្តិសុខឯកជនដែលបានឆ្លងវគ្គ ជាង៨,១២០នាក់។ ក្នុងនោះ បានស្ទាប់ស្ទង់ឃើញថា ភ្នាក់ងារសន្តិសុខឯកជន ដែលបានឆ្លងវគ្គនេះ ដែលជាភ្នាក់ងារសន្តិសុខឯកជន ពោពេញទៅដោយសមត្ថភាពពេញលេញ មានការយល់ដឹងខ្ពស់មាន និងក្រមសីលធម៌ល្អផងដែរ៕

(សូមអានបន្ត)